Кулеш, мачанка, бігас, верашчака, капыткі…. Не, гэта не лаянкі на тарабарскім, а стравы беларускай нацыянальнай кухні. І, калі вы думаеце, што яна абмяжоўваецца толькі дранікамі і калдунамі, тады надышоў час раз і назаўсёды развеяць гэты міф.
Беларусы славяцца сваёй гасціннасцю. Толькі госць на парог – пачастунак на стол. Я запрашаю вас у падарожжа па маёй малой радзіме, дзе вас накормяць вельмі смачна сняданкам, абедам, не забудуць падаць апетытны дэсерт, а лёгкая вячэра не сапсуе вашай фігуры.
Настаў час і абедаць. Пачэснае месца на стале займае хлеб, з ім ядуць і першыя, і другія стравы. Няма нічога смачней, як адрэзаць гарачую лусту, густа пасаліць яе і з’есці.
Калі на стале гусь і парася, то работа хараша. Так гавораць у народзе.
О, як ляжыць ён маляўніча
На падагнутых капытках,
Задзёршы ўгору пекны лычык
З пахучай траўкай у зубах!
Парасяціна адварная, свініна, запечаная па-дамашняму, гусяціна з грыбамі, качка з яблыкамі, зразы беларускія, каўбаскі сялянскія і іншая смаката – усё гэта адметныя стравы беларускай кухні.
Хтосьці аддае перавагу сушы, хтосьці не можа жыць без пасты ці піцы, а хтосьці і дня не можа пражыць без бульбы, якая круглы год не сыходзіць са стала беларусаў. Бабка, дранікі, камы, калдуны, клёцкі, запяканка, бульба ў гаршчочку, бульбяныя пызы – гонар нацыянальнай кухні беларусаў.
Да страў з рыбы беларусы ставяцца з вялікай прыязнасцю. Бяседны стол ніколі не будзе поўным без рыбы. З яе не толькі вараць юшку, рыбу соляць, вэндзяць, сушаць, смажаць, запякаюць.
На сняданак нам падаюць бліны. У печы ўжо разагрэлася патэльня. Цяпер у ход пайшла подмазка – звычайны шматок свінога сала. Яна ажно шыпіць, пішчыць, але сваю справу робіць. Цяпер трэба распусціць цеста тонкім і роўным слоем па ўсёй патэльні і сунуць яе ў печ. І вось пшанічны круг злятае з распаленай да чырвані патэльні і смачна пляскаецца на талерку. Ах, блін! Ім можна любавацца бясконца!
Пульхныя, румяныя, смачныя, духмяныя…. Спрабуем іх з варэннем, мёдам, смятанай. Але найсмачней мачаць бліны ў верашчаку – традыцыйная страва для мачання бліноў.
Бабуля пачастуе нас апетытным дэсертам. Шкада, што сёння многія не ведаюць, што такое жур. А гэта – аўсяны кісель, ён вельмі карысны для здароўя і ніколі не сапсуе вашай фігуры.
А яшчэ старажылы ведаюць сакрэт гістарычнага дэсерту “Архас”, вядомага ажно з 17 стагоддзя. Яго вельмі любіў Ян Сабескі, кароль Рэчы Паспалітай і Вялікі князь Літоўскі. Смачна есці!
